كمل جميلك وحطم فيني الباقي
هو إنت خليت بي شيء ما حطمته
دامك تلذذ لتعذيبي ولحراقي
وش يمنعك والقسى منك تعلمته

ما يزعجك لو تشوف الدمع بأحداقي
حتى ولو عن طريق الكذب جاملته
يعني ما قدرت حبي لك وأشواقي
والليل ياللي عشان أرضيك ما نمته

يمكنها غلطتي يوم أكشف أوراقي
وأسلمك قلب لو أدري ما سلمته
لكن بسيطة تبي تندم على فراقي
ولا يذبح الصامت أحيان سوى صمته

سلمت لك قبل روح الروح خفاقي
لا صنت روحي ولا قلبي بعد صنته
الله يا كبر جرحٍ حل بأعماقي
والجرح من كف غالي ما توقعته

كان الغلا ورد غالي وكنت أنا الساقي
لا طلت عطره ولا خنته ولا بعته
الله لنا والبقا في قلبي الراقي
والبعد والله صعب مهما تساهلته