اللي طموحه يضرب الحوم ويحوم
ويطير من عالي يدور لعالي
هذاك منزاله مع الجدي ونجوم
ما ينزل بأرض الوطا والهيالي

يا تابع القالات ومدور علوم
تمحي صواديف الليالي ليالي
تشوف عين الشمس ما غطاها النوم
تشرق وتظهر ظافيين الضلالي

ويبين من همه زباريق وهدوم
زين الحلايا والفعايل قلالي
لا طاح قايد لازم يعود ويقوم
مير البلا لا طاح تالي التوالي

اللي يطب السوق مشري ومسيوم
والغالي ما يعرض على السوق غالي
يا نايم أصحى لا تهنيك الحلوم
وتفز من نومتك مأخوذ جالي