يا ضحكة العمر يالأول ويالتالي
يا سيد القلب وإنت العشق وأسبابه
يا غايتي مطلب الخفاق يالغالي
يا كل عمري ولقلبي أقرب أحبابه

أهواك أهواك وإنت بس تحلالي
من بعدك القلب سكر كل أبوابه
ما هزني عذل عذالك وعذالي
عارف غلاتك وحبك إنت أدرى به

كيفي وذوقي ووحدك بس تحلالي
سيد مزاجي وقربك أحسب حسابه
لا شفت وجه القمر وجهك تهيا لي
وإنت سما وإلا غيرك غيم سحابه

حبيب عمري في حبك يا هنيالي
ومن كان قبلك تصدق ما أعترفنا به
سرقت قلبي ولا تسألني عن حالي
حالي يسرك وقلبي إنت أولى به

إنت الذي أتمنى شوفه قبالي
يا من عشانه حسدت أهله وقرابه
أشتاق شوفك يا نور العين وكحالي
والعين دايم لشوفك حيل طلابه

محد غيرك شغل عقلي شغل بالي
وغيرك حبيبي غرامي ما تهنا به
أشوف بك حب سامي ومنزله عالي
والحب غالي لغيرك ما رخصنا به