ما لبى قلبي لغير صوتك يا لبيه
وإن ما تلبي حروفي لبيتك سكوت
حي الذي كل طاري ذكره يحليه
يسحرني في همس الندى ولهفة الصوت

يشتاق لك قلبي وإسمك يسليه
يا شهد ورد الروض ويا سحر هاروت
ما يطيح قلبك والمحبة تعليه
وفي مهجتي له باني قصور وبيوت

إنت الهوى يا غايته ويا تغليه
يتنفسك قلبي غلا عمره ما يفوت
يا مشاغب فكري ولو الفرض أصليه
أحيا على طيفك وبك روحي أتموت

يا روض حسن ضاوي في تجليه
من كل فستان بك أوصاف ونعوت
قبلة عيوني بكل شطرٍ توليه
في كل درب أمشيه لك وجه منحوت

ما غيرك اللي بخاطري لو أمنيه
يا أحلى لحظات اللقا حظوظ وبخوت
إلا الغلا ما به كلامٍ يوفيه
إلا الغلا يا لبى قلب أعشقه موت

حي اللي به عيني تقر وتلبيه
يا بعد من لبى ويا حي هالصوت
ما لبى قلبي لغير صوتك يا لبيه
وإن ما تلبي حروفي لبيتك سكوت