كل ممكن معك أصبح مستحيل
كل حل يصير عندك مشكله
ويش أخلي من جروحك أو أشيل
والأخيرة منك مثل الأوله

ما بقى للعشق في بالي سبيل
لاحنين ولا مشاعر لا وله
حملتني عشرتك حمل ثقيل
وأنا ماني حمل هم وبهذله

يا قليل الحب وش ذنب القليل
اللي تجبرني في حبك أقبله
صرت أحس إني على قلبك دخيل
وإني مو أكثر مجرد مرحله

شف حزين العمر من وقتي يسيل
منكسر نبض وشعور وأسئلة
ما تصدق رح لحد المستحيل
تلقى قلبي هناك وتقدر تسأله