المر ذقته في لقمة عيش
ما عاد أميز ولا أذمر
بسك كفاية زماني ليش
ما تشوفني حيل متدمر

لاني براعي غرام وطيش
لا أوزع أرقام وأنمر
الحظ معنا قفل بشيش
كمل نخلنا ولا تمر

أحياناً غصب عليك تطيش
إذا الردي جاك متأمر
وإن صرت بعيونه الدرويش
أنا أشهد إن قلبك يجمر

والرزق لأنه غدا تنتيش
وجه الرجل دونه يحمر
أحدٍ زمانه فرش له ريش
واحد مراكيبه يسمر

مليت كيفك وساكن بيش
لا بيت شعبي ولا معمر
سلام يا نقطة التفتيش
كل من تعداني يزمر

كان المقاصد بها تطفيش
طبعي على الضيم ما خمر
لو إن موتي يجي بشويش
أموت أنا واقف ومشمر