يا حظ من هو ماخذنك عن الناس
يدري بغلاك وعن مشاعرك يدري
وأنا لك أفيض شعوري والإحساس
لو الزمان يمر والعمر يجري

أكفخ بجنحان الهوى كفخ جرناس
مطلع وصيده متجي عنه بدري
يا شعاه للهدات والصيد هوجاس
وإن هد ماشي دون هدته يذري

يناحر الصيده وينكس تنكاس
وينثر غمام الريش في الجو نثري
دام الفرص تأتي بلا سابق قياس
خلك لها متولم ودوم حذري
خلك لها متولم ودوم حذري

خذ الهوى بالروف واهتم بالساس
شيد لفهم الود والحب جسري
قلب تعلق بالهوى يشكي الباس
مجبور يصبر عالمقادير جبري

يا من غلاتك خالطت جر الأنفاس
أحس بك ترقى وتنزل في صدري
يا أغلى من أصناف الجواهر والألماس
يا فوع ورد نادر وفوع زهري

في روضن يهبه من النود نسناس
ينفح شذا عطره على ضفاف نهري
عليك يحمسني من الشوق حماس
وأفرد جناحيني مع الشوق وأسري

أسري على طاريك يا عذب الأجناس
وآخذ خبر طيفك وأوصله خبري
أشل قدرك فوق لعيوني والراس
وغلاك واثق به ولا يضيع هزري

في بعدك يراودني ألفين وسواس
وأروق في لقياك ويزين وطري
أشوف في شوفتك رفعة ونوماس
يا مجدي ونوماس عزي وفخري

يا حظ من هو ماخذنك عن الناس
يدري بغلاك وعن مشاعرك يدري