هلت تباشير السعد والسكينة
وتنوسمت نجد وتبسم قدرها
قامت تغطرف عقب ما هي حزينة
واستبشرت باللي بعدله سترها

محمد ابن سعود مرسي السفينة
أمن فيافيها وركد بحرها
تأسيس دولة لأجل ربه ودينه
بهمة رجال بدوها مع حضرها

إنشهد إنه جا في وقته وحينه
وحد أراضيها وحبه عمرها
سيرة إمام بالوفا ذاكرينه
جد الأئمة والملوك وفخرها

ومن يوم تركي حط الأجرب يمينه
حقق أمانيها وجلا خطرها
خلا الرياض العاصمة والمدينة
مدينة تسحر نظر من نظرها

من يوم أبو تركي لمحها بعينه
عبدالعزيز اللي بروحه أسرها
رجع حكم جده وجدد سنينه
وعقب الليالي السود شعشع قمرها

اليوم في عز ورخا عايشينه
أبو فهد سلمان جدد أثرها
وإن قلت أبو سلمان يا عارفينه
هلت سحايبها وفتح زهرها