هذي حياتك على كيفك وعش فيها
ما دامها ماشيه يا صاحبي مشي
خلك على قول بن جدلان مشيها
إن طعتني مشها ما دامها تمشي

أشواقنا لو ترى ضاق الحشى فيها
أرزاقنا عند وآلي الكون والعرشي
رزقك على سايق الغيمة ومنشيها
يرزقك من يرزق العصفور في العشي

من حط عينه بعينك شاف وش فيها
غمض عيونك وخل الحب بالخشي
كلمه من القلب ما نرضى الغشش فيها
ما قلتها لك على الماشي وأنا بمشي

عش في حياتك حبيبي وإنتعش فيها
ياما سحابٍ من العارض يبي ينشي
من صبح شموسها لازم يعشيها
واللي يضحي يجي له يوم ويعشي

منتب مكلف تعرف الناس وش فيها
لا ذاك وشو ولا هذي بعد وشي
نعرف حذر كل ريمٍ من مماشيها
من كثر ما هيب تتلفت وهي تمشي

يا كثر من راح في لجة غواشيها
ويا كثر من طاح متعلق على رمشي
قليبنا وانقطع حبل الرشا فيها
وأشياء ما قلت لك يا صاحبي وشي

أقرنس طيور حبي لك وأعشيها
وتقول هذي الطيور اللي معك وشي
جبت الحمامة حمامه ريشها فيها
وجبت المعاني على معناك بلمحشي

العذر يجبر خواطرنا ويشفيها
لو فيه أعذار عندك قلنا وشي
من كثر ما نيب بمشيها وامشيها
مشيتها لين وقفت ما قوت تمشي