زرت القمر عشرين مرة ورديت
واللي بحارتنا عجزنا نزوره
بعلا الفضا صوتك وصلني ورديت
رديت له رغم البعد والخطورة

أحمل هديه لأجل عينك بها جيت
من يد بنت البدر إلى يد نوره
لا تأخذك غيره تغتر بالصيت
ما عندها من حسنك إلا عشوره

إن كان يالغالي على دربي أنويت
أصعد مع اللي يجلب الخير شوره
قصرك على الكوكب بنيته وعليت
الصك باسمك وأستلم منه صوره

لا وصلت من بعد السفر وأستقريت
أختار أثاثه وأفرش أرضه ودوره
ترتاح لا عداد كهرب ولا ليت
إلا قمر يشرق بنورك ونوره

ياللي مسافر للقمر كانك أنويت
يجيز لك من دون فيزا عبوره
أعطي الجواز النار وأحرق بالزيت
راح الزمان اللي يذلك بجوره

وهذا الفضا وأعمل على ما تمنيت
لله من فرضه ومن في بحوره
وشرطي الفضا ما يسألك وش سويت
تو البلد ناشي وكلن بطوره

هذا الفضا وأعمل على ما تمنيت
فيه المواطن والهنا في شعوره
وأفلاك حولك لا طرى لك تمشيت
تدور بك وتعود في كل دوره

ما أخاف بكره لا تأخرت و أبطيت
يجيك راعي الأرض يشيد قصوره
دامك بشاطئ هاف مون إستجنيت
كيف القمر يشعل بشطه بحورع

ياللي على الأرض الوسيعة تربيت
لا تنخدع فيها ترى الأرض كوره