أتعبني الهجر لكن ما نزل راسي
وإنته بقلبي غلاك وعارف قدرك
إنته بطيبتك خذت القلب عن ناسي
لين إنتهى القلب يا محبوب في أمرك

أقول أحبك يجيني ردك القاسي
أدور رضاك وإنته تعاند بهجرك
أهديك الإحساس تكسر خاطر إحساسي
أقول صبرك ع قلبي ما رضى صبرك

جلاسي الناس لكن وين جلاسي
موجود معهم وجالس دون ما أدرك
أرحل عن الناس يملا القلب هوجاسي
يا معذب القلب قلي اليوم شو عذرك

إن كنت ناسي تذكر يوم يا ناسي
ألفين سبعة يناير يوم في عمرك
ماكنت راضي ولكن قلت لا باسي
ضحيت بأغلى حياتي بس ماضرك

لو كنت تبغي حبيبي تكتم أنفاسي
أرضى بنارك واعيش العمر في جمرك
وإن كان همك حبيبك فيه لا تاسي
يكفي المحبة ولو قطرة ندى ثغرك

أرجوك تلفي في المسا الماسي
نتعانق بحب صدري في حضن صدرك
تبنى قواعد محبتنا على الساسي
وأعيش مفتون يا مزيون في سحرك

أنا لقلبك حبيبي الجوهر الماسي
وانته هدية حبيبي حقي بكبرك
يا طيب الساس ودي رافع راسي
وارفع حبيبي معايا راسك وقدرك