بزعمه

أبزعمه أرجع له بعد كل ما صار
والله ما أرجع له ولا نيب راجع

مادام لي عزة لنفسي ومقدار
ما أرضى بتقليب الحزن والمواجع

ينساني أحسن له ويختار وأختار
درب الفراق ودونه الدرب واسع

ما عاد عندي وقت تبرير وأعذار
ومانيب لا شايف ولا نيب سامع

حب بدل حب ودار بدل دار
لا عين تبكي له ولا نيب جازع

المسألة كبرت وصدماتي كبار
في وقت حسن الظن ما هوب نافع

وما تلتقي بالحب جنّة مع نار
بيني وبينه فرق والفرق شاسع

وإن حب غيري ما تجرعت الأمرار
بالعكس ما عندي لو يحب مانع