من كثر عثراتي وخيبات العمر
وغدر الحبيب اللي غدى ما هو حبيب
ما عاد فيني حيل باقي أو صبر
وحالات حزني فيني تودي وتجيب

تلعب بي الآهات وإحساس القهر
من قسوة الإحباط والحال الصعيب
من قال بالدنيا بشر توفي البشر
واللي تحبّه فيه ظنك ما يخيب

لا والله إلا الغدر يتلاه الغدر
والحب كذبه بين شك وبين ريب
واللي تحبه ليش يطعن في الظهر
ترى أصعب الغدرات لا جت من قريب

صار الوفا نادر وغلطاتي عبر
والعمر في طوله وفي قصره كئيب
ما عاد أفكر في حبيب ولا أنتظر
مثل الغريب اللي مفارق له غريب

والليل هذا لا نجوم ولا قمر
وأشيائي الحلوة عن عيوني تغيب
لا حولي الميناء وأنا وسط البحر
وفي زحمة الأحزان قلبي مستصيب

عزاه يا عزاه يا خيبة عمر
عزاه يا قلبٍ غدى ما له حبيب
من كثر عثراتي وخيبات العمر
وغدر الحبيب اللي غدى ما هو حبيب