افا هذي نهاية من يحب ويعشق ويغليك
افا وش صار كن الحب ما عشناه بالمره
بعد ما كان لك قلبي طموحه بالعمر يرضيك
وشبك لك تحت كل الحب أصابع كفه العشره

رسمنا للحياة الحب وإحساسه بلا تشكيك
وطعنت بهقوة الهاقي وحار العاشق بأمره
أنا وشلون بتعايش وأعشم كل نفسي فيك
وأعيشك عمر وإنت اللي طعنت إحساسي بظهره

ولكن هذي نهاية شموخ لك نزل شاريك
بعد تجريحك اللي لو يمر لغيري بيكره
خذ أعذارك ولاني في حياتي بالهوى باغيك
رح بدربك وسلمي بك يتم العفو بالقدره

أنا ذاك الكبير اللي لو إنه فكر يخليك
يعيش أيامه بدونك حسب ما عاش بالخبره
ذبل حسه على صمت الحياة ولا ذكر ماضيك
يحاول يكسب أيامه لجل يفرح بها بكره