أنا من وين ما أوجه تصادف خطوتي طرياك
ولا أدري ليه ما فادت مع أفكاري معاذيري
على كثر الدروب اللي تودي لك عجزت ألقاك
تعبت أتبع سرابك لين ملتني مشاويري
تبعت من الزمن فكرة خذت من دورة الأفلاك
ولا فادت مع أوقاتي ولا عاشت بتفسيري

ولقيت من الحطام بداخلي أشياء ما تخفاك
ومع هذا حطامك كان من أغلى مساييري
وكرمته وقدرته لأنه مثلك وشرواك
وأبي منك العذر لامن لمست بيوم تقصيري

بنيتك لين ما ملت يدي وجاني الإدراك
وعيت من السهاد اللي خذاني من تفاكيري
عليك من الحشيمة في ضميري كل ما ناداك
خفوق ما يشوفك غير من أجمل مقاديري
لك التقدير رغم بعادك اللي بالعمر خلاك
تعيش بعيد وإنت أدرى بأن ماني مثل غيري