واقعي لو جيت في بالي بعد طول الغياب
مبداي واضح لو أجي ما به أبد أي مشكله
ما هو أبد شرط المحبّة لجل اجي وأفك باب
حشمة علاقه سابقه تجبرني بهالمسأله

ماني أبد بتبع خطا من راح به دربه وغاب
ولا أظن إنك بيوم أسلوبي هذا تجهله
لو جيت لا تستغرب رجوعي ولا يجيك ارتياب
ترا الوصل ما هو من أشواقي ولا هو من وله

بس إني أحشم عشرةٍ كانت تطول ابنا السحاب
ومن باب حسن الظن دايم ف الحياة الممهله
جيتك أبتطمن عليك ولا أبي منك جواب
وحبّيت أوضح لك بأنك لك مكان ومنزله

حتى لو ان ما الله كتب نحسب لهاللقيا حساب
بإذن الله أنا بنتجاوز ونتعدى المرحلة
مبداي واضح قلتها بأول حروفي بالكتاب
واللي يصد بحق عشرتنا أجي له واوصله