الله يهنيك بي والله يهنيني
والله يديم الغلا ما بيني وبينك
ساعة أشوفك يزين الكون في عيني
وأشوف كل المحبة تنطق بعينك

ما أظن شيٍ حبيبي عنك يغنيني
كل يوم يكبر بعيني حسنك وزينك
مزيون وصفك وسيد في المزاييني
وأحب طبعك وطيبة قلبك ولينك

إن غبت عنك دقايق تشتكي بيني
وإن غبت عني يصيح الشوق بي وينك
ما أقوى فراقك دخيلك لا تخليني
ما دام قلبي أمانه بس في يدينك

إنته بحبك تراك محلي سنيني
يا بعد عمري عسى الله يحلي سنينك
بالدنيا عندي رضاك ولا يكفيني
والله يديم الهنا ما بيني وبينك