مل قلبٍ لاعه التحنان وأشقاه الغيا
من غيابك لين هذا اليوم والهم اسروي

كني اللي طاول الظلما عقب طول الضيا
منطوي ويحس كنّ الكون مثله منطوي

حالتي صعبه وضيقة خاطري قلة حيا
يا سقى الله يوم لي قلب على الجفوة قوي

من بعد ماكان هذا القلب مرباع أخويا
ضاقت الدنيا عليه ولا بقى منهم خوي

يالحقيقه في الزمان الممتلي كذب وريا
ما بقى لي غير كلمه قبل مالصوت يهوي

وحق من سرا البروق اللي تبشر بالحيا
إنك أغلى من بكور الوسم في عين بدوي