يوم هب الوقت وأعماني عجاجه
الفرج عيا وأنا بالصبر راهي
ويوم مال وطال ميله واعوجاجه
رحت أدور شيٍ يشد إنتباهي

شفت زولك مقبلاً مثل إنفراجه
كنه اللي جايب عزي وجاهي
ياه يا ضيقات صدري وإبتهاجه
تذكر آخر مره شفتك متى هي

صاحبك من يومها زاد إحتياجه
وإمتطى ظهر المصايب والدواهي
يسولف الليلة على قلبي وناجه
من بقى لي غيرك أفخر به وأباهي

يا بعد من كدر غيابي مزاجه
ويا بعد من مرت حروفه شفاهي
رغم حيرة قلبك ورغم إنزعاجه
الزمن ما غير إحساسك تجاهي

ورغم وحشة بعدك وقسوة سياجه
كل حاجه فيك ظلت مثل ماهي
الخجل في وجهك أول ما نتواجه
والبراءة في عيونك وإنت ساهي

وبسمتك لا من بغيت تقول حاجه
وغيرتك لا شفت كني عنك لاهي
قبل أشوفك والزمن عاقد حجاجه
أسأله وش فيك وألقى العذر واهي

ويوم شفتك قلت للوقت وعجاجه
هيه يا اللي في طعونك كنت راهي
إنت لو غيرت فينا ألف حاجه
القلوب البيض تبقى مثل ماهي