فراش الوهم يرتاح من عاش نايم فيه
ويحس بتعب بعدين لا قام من نومه
ولقى واقعه ما هو بمثل الذي يرجيه
وتخاصم مع نفس بالأفراح موهومه

طريق السعادة صعب لا بد من يمشيه
يعاني ولا منه عطش يشرب همومه
عشان السعادة عقب طول العطش ترويه
ويقسم ظهر من قال ماهي مقسومه

يجيني بعض هالناس ويقول لي يا هيه
ترى المستريح اللي على قده حلومه
وأقول البطل لا شاف حلمه صعب يغريه
ويركض وراه وكل ماطاح له قومه

يقولون لي تحلم وأنا أقول طيب ليه
مدامه مجرد حلم تشغلكم علومه
فراش الوهم خلوا عذولي يريح فيه
إلين أوصل اهدافي وصحوه من نومه