وقف لي يوم صافحت النجوم وعن مصابيحه
بغيت أصد وأدركت الحسايف إيش سوت به
وذكرته بنفسي بس ما حاولت تجريحه
مع إنه كان حاقرني ولي حق أتشمت به

أنا ذاك الصغير اللي قطع حبلين مرجيحة
عشان تطير به لكن بدل ما تطير طاحت به
ولكنه خذا درس وتعلم عقب هالطيحة
وربطها في جناحين أمنياته لين طارت به

تمرجحت بسماي وصرت أشم لسحبها ريحة
تقل كن الأمل عود بمباخرها وفاحت به
بعد ما كنت من ياسي أجيه وفيني الصيحة
وأروح وحالتي أصعب من الوضع الذي جت به

جرح واجد وأنا عني كواحد من مجاريحه
مسامح والسماح أعلى من أحقاد البشر رتبة
عسى الله بس يهدي الناس وتحلله وتبيحه
وغروره ما ينسيه الحسايف إيش سوت به.