لو تبيها بالمشاعر والأحاسيس الكريمة
اللي يطلع من شعوري ماني قايل رجعه
كل بايع في طريقي لو يقاضيني بقيمه
إن نويت أدفع حسابه أترك الباقي معه

لو تبيها بالمواجع والخيانة والشتيمة
ما بقى لك شي عندي تقدر إنك تجمعه
صمتي في نظرة عربنا رمز للحاكم وشيمه
وإنت في نظرة عربكم صمت غافل وإمعه

لو تبيها بالتمنن سابق الخير وزعيمه
لو سبقني الخير مرره مرتيني بأربعه
الحساب اللي تقفل والفواتير القديمة
تثبت إن الحق عندي وتاركن حقي سعه

لو تبيها بالمعارك لا تناظر للهزيمة
يمكن المغلوب فايز وإنسحابه يرفعه
وإني لا مرة بحارب وأرسم الخطة العظيمة
ما تفرحني مضره بانتقام وزعزعه

لو تبيها بالسوالف بالتناجي والذميمة
أقطع لساني لو إني كنت عاجز أمنعه
أربع الوجهات دربك لو لنا صدفه عقيمه
بختلق خامس لدربي روح كل الأربعة

لو تبيها بالتراضي والتساوي بالظليمة
عاذرك وأشكر جهودك عشت رحلة ممتعة
ما أبي رد الجمايل من ليالينا القديمة
طير حر لو بهاجر ما تهم الأمتعة