أنا طفل في عقل كهل وشكل شاب
الوقت سوا في حياتي سوايا
صدري وطن تجمعوا فيه الاغراب
ضيعت فيه الراعي من الرعايا

يوله علي من يوله يغيب من غاب
ما ملت وجيه الوجيه المرايا
لو قلبوا قلبي لقوا قلبي كتاب
مملي حنين وذكريات وحكايا

مثل الهوا بين النوافذ والأبواب
يمر حلمي ما لقى له زوايا
ما شلته ب عيني وظللته أهداب
عشان أكون ب يوم حلم الصبايا

فيني عيوب انظر لها نظرة اعجاب
وأشوفها ف عيون غيري مزايا
مشكلتي إني ما أعرف اخذ بالأسباب
أعطي وصايا بس ما أقبل وصايا

الصدق ما خلا لي أقراب وأصحاب
يا صدق تبغى الصدق حنا الضحايا
لو للنوايا صوت في سمع الألباب
بنصدق الألباب وإلا النوايا

ما عاد في صمتي مشاريه وعتاب
ولا عاد عذري يستحق الخطايا
عندي هدايا بس ما عندي احباب
عطوني الأحباب وأخذوا الهدايا