لي صاحبٍ رمش الغلا راس ماله
وأحكم أنا قلبه في عرضه وطوله
ماله سواي وساكنٍ في خياله
وأجري بدمه في طلوعه ونزوله

محفور في قلبه وفكره وباله
كني مؤسس للغلا فيه دوله
دستورها حبٍ فريد مثاله
وأشرع أحكامه بصوله وجوله

عرشي وتاجي جمّله من جماله
صافي وحوله كل العيون حوله
أهديت أنا للشمس هاله وهاله
ألوانها سحر وجمال وطفولة

منه أستحى بدر التمام وكماله
والنجم غازله بنظرة خجولة
والطيف كلمه وعشق سؤاله
واحتارت ألوانه مين اللي تقوله

والورد ورد وأحتفى بإحتفاله
وآل الطبيعة حسنها صدقوله
حبّه تفرد بي ووثق حباله
عيني تشوف الناس دونه ملوله

ما يرتضي قلبي بغيره مناله
والحب دونه مضمحلة سيوله
وأنا جنوني هب من حب خاله
أنا جنوني يعتمد ما يقوله

إن قلت وصلي قال عمري تداله
وصيفه تساوه مثل باقي فصوله
وإن قلت صدي بعد صدره وحاله
وتشربكت في مقبلاته حلوله