ولا تحزن إذا ما غنت الدنيا على ليلاك
تبسم و أنتظر ليلاك هي اللي تغني لك
ولا تحزن على حزة مغيب الشمس عن دنياك
تغيب و عذرها تأخذ صباح الغير من ليلك

ولا تحزن على أرضك إذا صار الوطن منفاك
تمسك ب آخر ترابه الين ترابه يشيلك
ولا تحزن إذا صرت الغريب بطبعك و مبداك
مدام الحلم حلمك لازم التأويل تاويلك

ولا تحزن إذا ما فيه غير الذنب شي ابكاك
دموع لغير وجه الله ما تسوى مناديلك
ولا تحزن إذا ما باقي إلا يديك في مخباك
نصيب كاتبه ربّي يجي لك غصب بيجي لك

ولا تحزن لو اصحابك ورا ظهرك تصير عداك
ورا ظهرك بتلقى ناس تفرح لك و تدعي لك
ولا تحزن على اللي ما نسيت إنه قدر ينساك
تاكد من يضحي فيك لا يمكن يضحي لك

ولا تحزن على عثرات عمرك جعلها تفداك
تشوف المقبل أجمل كل ما توقف على حيلك
ولا تحزن إذا ما انصفوك الناس في محياك
تموت و يسرفون الناس في مدحك و تبجيلك