على كثر القصيد وكثر ما جاب الخيال أفكار
تعبت وما لقيت إلا ثمان أشياء تشبه لك
نور الشمس لون الغيم طهر الماء وصمت النار
لين الورد فجر العيد ملك وإنسان يا سهلك

إذا كان العنا رحلة بسميك آخر المشوار
وإذا صار البخل عمرِ الجزايل فإسمك المهلك
تجين أحلى من البشرى تغيبين وتشين الدار
هديه للزمن جيتي من الله عن طريق أهلك

صحيح المدح لو يقدر يقوم بنفسه ويختار
غدى عبّاد شمسٍ لا لمح زولك توجه لك
ضياء تسعين شمسٍ وألف بدر ونجمتين كبار
أخاف أقول ظلك وأظلمك والعز كله لك

غيوض وما يغيض النرجس إلا ضحكة النوار
وكل الجود لو يفنى فنا من زود حبه لك
ورثتي مجد أبوك وجاك منهو زبنة لمن جار
أبو خيرين دماح الخطأ والعمر مده لك

أنا وش عاد أقول إن صرت في وصف الغلا محتار
شعورٍ ما قدر ياصل سماك وقلت أزمه لك
وعلى كثر القصيد وكثر ما قلنا من الأشعار
عجزت وما لقيت إلا سموك بس تشبهلك