لا كتبتك بالرصاص بدفتري إحساسي ومحيتك
أرجع أدور بقايا اسمك بمحايتي

وما أحس إني نسيت ولا أحس إني قريتك
قد ما أحس إني مدري منك وش هي غايتي

خايف أتمنى لقاك وما ألقيني لقيتك
عند حسن الظن وأبلش وقتها في منيتي

وإن نويت أجفاك قلي كيف أبضمن لا جفيتك
ما يرجعني شعوري بالندم عني نيتي

تدري ليه إن قلت أببعد عنك ألقى نفسي جيتك
لأنك بكل اتجاهات الصدود مرايتي

يا اللي كل أشباه وجهي تحكي عنك لا طريتك
وإنت ما عمري على وجهك قريت حكايتي

أبتديتك من عرفتك وأشعر إني ما انتهيتك
واللي ما بين البدايه والنهايه دنيتي

أكتبك فيها برصاص وكل ما تخطي محيتك
وتنكر سطوري غلاك وتعترف محايتي