يا لايمتني ما بقى لي شفاعه
ساد الشكل وتغيرت كل الأوضاع

ما عاد لك مني ولا حرف طاعه
حل الفراق اللي على الوصل قطاع

في طي لحظه افترقنا بساعه
ماني على فرقاك يا بنت جزاع

ما يمنعك خافق يعرف المناعه
لو للهوى في خاطري حمل ووضاع

أغواك من هو ساعي بالقطاعه
وشلون تفكيرك على الذم ينصاع

تعطيه للهرجات وأهل الإشاعه
لولا بني جنسك على الغيرة جياع

للصدق في نفسي بحفظه وداعه
وللفكر بخصال الموازين جماع

أقدم جميل العطا باستطاعه
قدمت ما عندي ومنك العطا ضاع