كفي عن أسلوب النشب والطلايب
إنتي لك أسبابك وأنا أيضا لي أسباب
لا ضاق صدرك عرضيه الهبايب
عمر العمر مادام والوقت ما طاب

الشرهة اللي ما وراها نجايب
سوقي تواليها على باب نهاب
والشرهة اللي مثل حمل الركايب
قلبي لها مرحب وفكري لها جراب

والزفرة اللي ما تحرك ذوايب
ردي على إبهامك وعضيه بالناب
وإن كان حلمك بين حاضر وغايب
ترى الصلاة تجوز من غير محراب

تدرين وأدري ذا زمان العجايب
الصد له بابين والوصل له باب
الله يساعدني إذا كنت صايب
والله يسامحني إذا الجهد ما صاب