يا حبيبي إسمك أمل قلبي من طاول عناه
يا أمل كل الرجا في وصالك والأمل

هو يصير أو ما يصير اجتماعٍ في الحياة
حبنا بين المحبين يضرب به مثل

رغبتي بمشاهدك يا هوى القلب ومناه
محتمل يحرق ضميري غرامك محتمل

خف من الله وارحم اللي حصل له ما كفاه
ما كمل شرط الغلا والمحبة ما كمل

صاحبي مضنون عيني ذبحني في غلاه
لو بغيت أصبر وأجامل تبين بي خلل

صاب قلبي في سهوم الغرام اللي رماه
هو ربيع القلب لو ضرني عقب المحل

كن خده في الدجى بارقٍ يضوي سناه
أو قمر خمسة عشر ما بوصفي له زلل

منزله بقصى الحشا ما يطوله من بغاه
لين حله واستحله ثم سوى به محل

الرجا بالله قوي ما يخيب من رجاه
ما تضيع الكلمة اللي عليها معتمل

والخطأ راعيه لازم يجازى في خطاه
الجزاء بين المحبين من جنس العمل