قولوا للغالي قولوله
وشهوله يبطي وشهوله
ما جا ولا جا مرسوله
والحب الله يكفي شره

أنا عليل الضماير
أنشد وأسوق البشاير
همي زاد وفكري حاير
فارقني والفرقه مره

أمشي وأنشد عن مظنوني
وأسهر وأنتم ما تدروني
دامي ما شفته بعيوني
ما ترقد عيني منسره

أترك سكة وأقبض سكة
لقيت أبوابٍ منصكة
جيت الطايف وأهل مكة
قالوا ما شفنا له جره

جيت أهل أبها وأهل الوادي
وأنشدهم حضر وبوادي
قالوا عود يالنشادي
ما جا الدواسر والمره

وأنشد شمر وأنشد علوى
وأهل قطر وأهل سلوى
قلت أنا مبليٍ بلوه
في زين المبسم والغره

قالوا لي وشلون أوصافه
نرسل له ناسٍ عرافة
تجوب أبنجدٍ وأطرافه
تنشد وتلقاها مقره

قلت أوصافه يا خلق الله
كامل والكامل وجه الله
في عيني ما مثله والله
قلته مره بآخر مره

أوصاف الغالي غريبة
عين وخد وجيد وهيبة
عذبني والله حسيبه
ياما شكيت المضره