خذ راحتك لا صار جرحي يسليك
إجرح ترى روحي لك الله وهبها

لا تنشد المجروح لا تقول وش فيك
وش عاد لو نفسي شكت من تعبها

جرحي اللي جا بالقلب ما هو بخافيك
شوفك ربيع النفس وقربك طربها

ليتك تذكر يوم أسامح وأداريك
يا قدرة الله كل نفس وأدبها

ياما عذرت بلحظة كنت أجازيك
لا شك حلم النفس هون غضبها

مني تبدل همك اللي مخاويك
جور الزمن ضيم الليالي وتعبها

إرجع وحاسب سالف الوقت ماضيك
وشلون تنسى غلطة مرتكبها