قدر قدر موضوعنا أكبر من بيوت الشعر
وأحداث مرت تنسي وأحداث تمت عالقه
حاولت أفسر ما مضى وأستخرج دروس وعبر
في مدرسة الأيام واكتب لي قصيدة فارقه

بديت أدور في وجوده الناس يا ليل وقمر
كل الوجوه تغيرت وين الوجوه الشارقه
شو السالفة تزرع وفاء نستقي وفاء ينبت غدر
لا يطعنك إلا قريب من وفاك تعانقه

سبحت في بحر الوله ما فيه للشاطي أثر
وبحر الوله حتى الشواطي فيه ناسٍ غارقه
بعض الغلا يرفعك لين المجد ومخلد ذكر
وبعض الغلا ينزلك من نيف السنين الشاهقه

وأنا ما بين البين لا هذي ولا هذي مقر
ساعات دنيانا مطر ساعات جمره حارقه
وأنا خيالي يستهيض الشعر ويسيل نهر
وأنا نهر ميت ضما يبكي سحاب مفارقه

في العالية صوتك بقى لبيه من صوتك عبر
ويفز قلبي من غلاه وأقوم شوق أعانقه
وأنا كتبتك من ثلاث حروف يا حص البحر
كل حرف لي نبض وعمر كل حرف قلبي عاشقه

أحتاج لك في دنيتي وتمر في بالي صور
وأحتاج لك مثل النفس للروح صعب أفارقه
ما دام عشت بحبكم كل نبض في قلبي فخر
وأنا أصايل في العمر دايم علامه فارقه