رحت يم الطبيب اللي يداوي الجروحي
قال جرح المودة ما يسر الدوا به
قلت قلبي تكلف يا الطبيب النصوحي
قال طبه مع اللي ولعه واشتقى به

قلت بالله تجمل دلني وين أروحي
وين أبلقى علاجي والأداوي تشابه
أول الليل أهوجس وآخر الليل أنوحي
وآعذاب المولع بالهوى وآعذابه

صابني بالعيون والحجاج الذبوحي
وأحمر المبسم اللي ما يعالج صوابه
منك روحي خطيرة يا حبيبي تروحي
الهوى يذبح العاشق وهو ما درابه

ليت عينك تشوف وليت مسمعك يوحي
يوم أنادي ودمعي مثل وبل السحابه
آه من واهجٍ آه بأقصى الضماير يفوحي
كل ما أشرب عليه الما يزيد إلتهابه

يا حبيبي علامك بالمواصل شحوحي
أرحم اللي معاك ما جابه الورق جابه
جاك علم الصحيح وراح هرج المزوحي
كل شيٍ إلا التفرق ما حسبنا حسابه