قلتي لي إنسى
ومن يومها
وأنا كل ليلة
قدامي البرواز

حبر العيون
ودمع القلم
في دفتري

وصورتك
رغم الألم
ورغم إنها خذت من أطبايعك كثير
وخانت البرواز
أشوفها في خاطري

حبيبتي ما بيدي حيلة
لا صرتي الصورة
وعيوني البرواز
وشلون إبنسى

أتعبتي الصورة مشاوير
وتعبت أنا بلقى لغدرك معاذير

وصورتك اللي سجنت بروازها طول السنين
كانت جسد وبروازها الروح
ويوم نزعت منه الجسد تجرحت أطرافها
وبجروحها راحت لمين
لبروازها الثاني

مسكين مسكين مسكين
بيسجنك ويبقى سجين
تشبه لك أقداره خانته
وصورتك يجي يوم وتخونه
حبيبتي أو للأسف حبيبته
لا صرتي الصورة
وجفونه البرواز
وشلون ينسى

حبيبتي
لجل أنسى جرحك وأستريح
ببكي
وبعد البكى ببكي
وأكيد في لحظة بتجي
وبيجف دمعي

وعندها صورتك اللي في عيوني
بتعاف برواز الظمى
بتصير صحرا وهو سما
وبتمرني الدمعة الأخيرة
تأخذ معاها صورتك وتطيح

وكني بهالدمعة
سكين جرحها وجهي
وكني بالمسافة تطول
ما بين عيني ودمعتي وخدي
وكني بقلب الحاير المسكين
نبضه يقول
لا تودع الفرقى
الدمع ما يرقى

وعندها
لا نزلت الدمعة من الجرح الأخير
وفارقت وجهي أنا
بغمض عيوني وأكسر البرواز
وأكيد أبنسى