كنت أظن إنه بيوحشني شعور الاشتياق
واكتشفت إنه وأنا وياك ما ينقص يزيد
كل ما عانقتك أحتاج المزيد من العناق
وكل ما أروى من حنانك أرجع أظمى من جديد

للفراق أسباب واجد بس ما عمر الفراق
يجعل اللي فارق أحبابه مع نفسه سعيد
وإنت وصلك جنتي والبعد عنك لا يطاق
جعل عمر الوصل ما بيني وما بينك مديد

اختلاف الرأي ما يلغي وجود الاتفاق
إن لك رأي بمحبتنا مثل رأيي سديد
وإن مهما صار ما يخرج حبيبي عن سياق
واحد وواحد يساوي اثنين وافهم يا عنيد

حبك أوسع من جميع الكون لو هالكون ضاق
إقرب أكثر نسنا أرجوك وش معنى بعيد
لين من هالقرب يوحشنا شعور الاشتياق
ونبتعد لحظات والأشواق ما تنقص يزيد