يقولون المحبة الصادقة تبغي فعل وكفاح
وأنا اللي كافح الدنيا وآخر همي حسادي
أنا مركب رفض يقبل نوايا الموج والأرياح
أموت بعز لكني أنا ما غير مرادي

تبي التفاح بالمنطق تعلم توصل التفاح
ترا التفاح ما ينزل على راحات الأيادي
أنا ما عيش في كذبة علاء الدين والمصباح
أرددها مثل غيري عشان أنيم أولادي

أنا أكره ناس للحاجة تجيني بدمعة التمساح
وأنا اللي أكرم الصادق ولو هو ياخذ أعيادي
أنا فيني مشاعر تستهيض البلبل الصداح
أنا فيني قصايد طيرت من عيني رقادي

عشقتك في زمن كاذب وفيه الحب لعب مزاح
ولقيتك إنته الصادق وغيرك أخسره عادي
كفايه إن كتبت إسمك على الأوراق أنا أرتاح
وكفايه ما نطقت إسمك وقلبي بإسمك ينادي

خرز إسمك على قلبي وعرقي خيط للمسباح
أعيشك في طمأنينة وكني عايش بلادي
قلوب الناس ما تخلق معاها للزمن مفتاح
وأحسك إنت مفتاح القلوب ولحظه إسعادي

وأنا مثل الخلوج إللي تحن إذا نوو مسراح
وأحس روحي على شداد المطيه لا حدى حادي
صحيح الحب له قسمه وربي مازج الأرواح
مزج روحك معا روحي وقلبك مازج فؤادي