يا حياتي ويا غلاي ويا غرامي
الله جابك نور ولعيني سنا
يا احتياجي ويا حياة ويا اهتمامي
ما عنك صدة ولا عنك غنى

في وجودك ليه أنا أكمل كلامي
أعشقك من الفرح لين العنا
أشبهك في كل شي إلا الأسامي
يا أنا يا إنت يا إنت أنا

يا شموخ ويا كرامة يا احترامي
لين كفي طاول النجم وجنى
يا سمو ويا طموح ويا التزامي
من عرفتك كل هالعالم فنى

يا فديتك من هنا مليون عامي
وكل عام يزيد العام بهنا
إنت أغلى ومن غلاك لا ألامي
إنت أغلى من الحياة ومن الضنا

يا سحاب ويا كرم إن جيت ضامي
صرت بعيوني مثل وادي بنى
قلب أصايل عن هوى الباقين صامي
وإنت عنهم تغني فؤادي غنا

روضتك عين الغلا لا ما تنامي
لين غيرك قال بس الله لنا
إنت حبك مستحيل إنه يسامي
زاد حبك كل ما العالم شنى