أخلف مع نفسي اللي دايم أوعدها
إني بدونك حياتي بقدر أسعدها
وأصدق ولكن الوله في مهجتي أصدق
من لحظةً بالتغلي ما تعودها

يجبرني الظن والأشواق والغيرة
لله در الهقاوي فيك ما بعدها
حالى من الوجد صار يبان بعيوني
والوصل كحل العيون وبعد كرمدها

كأني في قلبي المشتاق لك فتنة
هديتها بالتغاضي لا تصعدها
كل المدن اللي بها إحساسنا ذكرى
تشبه مدينة بقلبي لك مشيدها

كلمة أحبك قبل ما توصل شفاهك
ينطق بها القلب وإحساسي يرددها
بعض الليالي بوجدي منك تسهرني
والبعض من حلوها ما ودي أرقدها

يحكم لك القلبٍ لإنصافك ويظلمني
وعواطفه ما قدر حكمه يجردها
لأنه يحبك ويحلم بك ويحيا بك
وامانه البيض مايقدر يبددها