ليه ساكت وين عذرك جرب احكي أي شي
كنت أقول إنك تخبي من ورا صمتك غنايم
هات حرفك وأنا أكمل راح أصدق عذري لي
بس لا تشمت عذولٍ شاف بعيوني الهزايم

كيف آمنتك بقلبي وكيف بديتك علي
وكيف بعت اللي شراك وكيف صرت اليوم سايم

في الحقيقة كنت أقسى وقسوتك ما فيها زي
أقسى من لحظة وداعٍ فرقت هايم وهايم
كان صوتي طرق بابٍ ينتظر تفتحه لي
يا اللي أقفيت بشعورك ما يجيبك لوم لايم

وين ما خذني حبيبي وين ما خذ كل شي
وين قلبك ما يجاوب وين طير الحب حايم

يا حبيب الجرح كمل طعنتك ما زلت حي
قبل تمشي خذ شعوري مثل ما سويت دايم
شمس بعدك في خفوقي شارقه من دون ضي
وين أدور ظل منها وكيف أبهرب من الظلايم

ليه قلبي ما يعافك ليه تكوي القلب كي
وليه ما زاله يحبك وإنته تهديه الهزايم