لا باس يالمحبوب روحي تفداك
لا باس يا مضنون عيني حبيبي

يا عل ربّي يا هوى البال يا قاك
من كل شر وكل جرح عطيبي

يا ليتني خذت المرض عنك ما جاك
وتصير من بد الخلايق طبيبي

ترى حياتي ما تهنى بلياك
ليتك دواماً عند عيني قريبي

يا ليتني نسمة صباحاً بدنياك
ألثم جبينك عقب طول المغيبي

أو ليتني طيفاً يزورك بممساك
وأشاهدك وأقول يا نفس طيبي

بالحيل أحبك وأعشقك وأتمناك
يشهد على ما أقول دمعاً سكيبي

أنا دخيلك لا تطوّل بفرقاك
رد لعيوني نومها اللي حريبي