غلاها يا كبر عندي غلاها
عشقها القلب والخاطر هواها
تولعت بهواها دون مدري
وباع الناس قلبي واشتراها

تلاشى البدر من طلعة ضياها
جمال الكون كله في سناها
بديت أغار من نفسي عليها
وأغار من العيون اللي تراها

إله العرش بالحسن إنتقاها
يحق لها بطلعتها اتباها
عليها من الدلع نظرات تاسر
أشوف القلب مايصبر بلاها

معاها بهجت أيامي معاها
رضاها غاية النفس ومناها
عساها ترحم محب متيم
شفى المجروح كله في لقاها