النسا روح المسا والليل لو فكر يبات
كان ما فيه أغنيات وكان ماله ذكريات
وكان ما فينا عظيم وما لأمانينا حليف
وما بنا قلبٍ وليف ولا لنا قصد شريف

النسا نصف الحياة إلا النسا كل الحياة
آه يا أسرار الخوات آه يا أحلام البنات
آه يالطيش الطفولي آه يالحسن الشفيف
آه يالعشق العفيف آه يالجنس اللطيف

علمن حتى المرايا والشبابيك اللغات
والرسايل والدواة صارت أعذب مفردات
كم بكن وبكف مبصر وأضحكن وأبصر كفيف
وأرمشن وأهتز سيف وأهمسن وأمتد ريف

كم غدن لإخوانهن عزوة صناديد عصاة
بين صفق المرهفات وبين ضبح العاديات
طاحت أشناب وكراسي وأنطلق دمع ونزيف
وأعتلى الخف المنيف والمقابر تستضيف

في بلادي يحسبون إن النسا متخلفات
في المسا مستوطنات وفي الضحى مستعمرات
ما دروا عن هالبيارق شمّخ العرض النظيف
فرعة الدين الحنيف شجرة العز الكثيف

النسا ضلعٍ عوج لولاه كل العدل مات
مالهن عنا فوات ولا لنا عنهن غنات
تبرق الدنيا على إيديهن ويغرينا القنيف
نطمع بتكريم ضيف ونوقف بيوم عصيف

النسا موجٍ على بحره منايا وأمنيات
والنسا مركب نجاة نسأل الله الثبات
هن لباس وهن فراش وهن معاش وهن رغيف
إن فتك جوع مخيف وإن حدا الرجال حيف

النسا حتى شراب الجنة العذب الفرات
تحت ماطى الأمهات يا لهن من مكرمات
كل ما عود من الكد أقبل ابن آدم ضعيف
له ورا البيبان طيف مثل نسناس المصيف

كم مكان يعرض أعراض آنسات وسيدات
والهوى له بايعات والغلاف وله فتاة
والحسن تشبير عنق وطول وخصرٍ نحيف
وشي ما ينشاف شيف لأجل الأول والوصيف

شهب تشابه رسوم الشاشة المتحركات
ما لزمتهن طرات ولا لهن ملح وحلاة
لا ربيعٍ فيه خير ولابه إلا بروق صيف
والشتا ما به رفيف يحي أوراق الخريف

غاده وسجاده وكفين وحجاب وصلاة
من صبايا محصنات من عروقٍ طيبات
لي مناحل لي خلايا كلها سكر نبات
لي حصون ناعمات لي غصون شامخات

لي قوارير ملاه العقل والدم الخفيف
خلفها العمر الكليف ودونها الحد الرهيف
يا زمن وش جاب حلوى غلفوها بالعباة
جنب حلوى للمشاة وللغبار وللشتات

شف بدل ماهي لواحد صارت لجمعٍ لفيف
كيف أنا خبرك كيف شوفها فوق الرصيف