الله اللي راد والعقدة قضاها اللي عقدها
لا على الدنيا سلام ولا لباقي العمر زينه

الفضاء ما كنه إلا خيمة طاحت عمدها
والفرح ما كنه إلا شيخٍ إنقصت يمينه

والعمر قطعة زجاج انكسرت ولا طال أمدها
والعرب في العيد بدموع اليتامى مستهينه

والشوارع لفها ثوب الظلام اللي هجدها
والبيوت أطلال من عقب المحبّة والسكينة

والشتا والليل والبرد وسما يصرخ رعدها
والعيون اللي ورا الشباك مذعوره حزينه

طولوا في الكهف الأصحاب وبقت روحي وحدها
كنها في كوكب ثاني خلا من ساكنينه

الوداع اللي بعلم لعيني أعبر من رمدها
والوداع اللي بلا علم القفص صدري غبينه

والوداع اللي بلا رجعه على أمر وأدهى
والله إنه غررت سم وسكاكين سنينه

والعنود اللي جفيت الناس والدنيا بعدها
مدت الفرقا لغاليها وهي تعطي الثمينه

وينها كيف اتركتني ليه ما جت في وعدها
والقمر لا طل خابرها تجي بيني وبينه

رحت أنادي واتلمس في مهب الريح يدها
كني حصان بلا صاحب طوى البيدا حنينه

رحت أصيح وينه والعرب ما رد أحدها
ما سمعت إلا صدى صوتي يقول الصبح وينه

كنهم من يوم ذيك الشمس غابت عن بلدها
طلعوني في النفود وكو أبواب المدينه

كنهم من يوم ذيك الذاهبه محدٍ وجدها
كل رجال من الشرهه قلع في الدرب عينه

أثرها ماتت وماتت كل فرحه في مهدها
والربيع اقفت به اللي كانت التاج لجبينه

جاورت عقب الحدائق حفرة ما أقسى لحدها
حفرة ماني مصدق كيف ضمت ياسمينه

للحزن فيني مثل ما للطهاره في جسدها
ويش أسوي لا فتشت اللي لها وسط الخزينه

زخرفت حلم وبنت له مسكن وسمت ولدها
آه لو غرد ولدها في خميلة والدينه

عاهدتني واكفرت بيمين أقوى من عهدها
والصبي لا خير فيه إن كان ما نفذ يمينه

ما تتقى عن رثاها عرق اقتض بشهدها
ولا تبقى خلف قضبان الجفن عذرى سجينه

كيف عند العالم أيام العزا ما أحصى عددها
ولا أنا طالت شهورها والله أعلم عن سنينه

لا الثرى فيها نبات ولا المشي خفف نكدها
لا السما فيها طيور ولا البحر يمه سفينه

لا القمر هذا مساه ولا العصا هذا رغدها
لا الزهر هذا شذاه ولا الذهب هذا رنينه

قالوا الشيخ الفلاني مرجع القوم وسندها
قال يبشر بالعوض والعلم جينا ناقلينه

ساق لك بدر البدور اللي نشدها من نشدها
جادل هزت عروش وخيبت روس ذهنيه

قسمها في رسمها في جسمها إلا في رشدها
وإسمها إن جال الغضب قومه على الألسن رطينه

أترك الناي وعطيه شيخنا غن لسعدها
وانبسط يا عم وانس اللي ورا التربه دفينه

قلت ولصدري تناهيت تروع من شهدها
آه وويلاه من يجلب على قلبي ضنينه

خلوا أغلى ذاهبه ترعى ربيع اللي فقدها
والعطا راعيه محد صوبه الله لا يهينه

لو ضمنت الجنّة بتفاحة القلب وشهدها
قلت من بكره عسى مجنونها تاقف سنينه

الله اللي راد والعقده قضاها اللي عقدها
لا على الدنيا سلام ولا باقي العمر زينه