اللي أقوله يختلف عن كلامي
ما كل كيف الحال قصدي بها الحال
أحيان كيفك تعني القلب ضامي
وأحيان وينك تعني البعد قتال
والنظرة اللي كل ما أنهي سلامي
فيها حكي باقي لها الحين ما أنقال

لو بان نورك ما شقيت بظلامي
لو بس خطوة جيتني جيتك أميال
وديان عينك لو تحن لغمامي
طاح المطر كله من الشوق وانهال
لا يشغلك في يوم قل اهتمامي
مهتم في أشياء ما تجي لك على البال

يا من تنسيني ملامح وأسامي
يا من تغيرني من أحوال لأحوال
طالت وأنا ما قلت لك عن هيامي
ومقسا على العاشق من الشوق لا طال
قلي مدامك تستحي من كلامي
اشتقت لك بالصمت وشلون تنقال