نويت مرباع الغظي سيد الأحباب
قصدي يزول الجرح زاد التهابه
جيت وبقايا نارهم حول الأطناب
بيت الشعر مطوي وباقي زهابه

أقفت ركايبهم ومني الهدب ذاب
من دمعي يسأل وأنذهل بالإجابة

على غزير الدمع ضميت الأهداب
صديت لين الدمع يكفي سحابه
بعض الوجع يمكن يداويه الأعشاب
وبعض الوجع يا ويل منهو سطا به

عشق بدوي لا حب ما هو بكذاب
يوفي ولو جرحه تجدد صوابه

واليوم وصلت بيننا مثل الأجناب
ذاك الغلا يا ضيعته يا سفابه
باكر إذا جينا لهم مثل الأغراب
من عقب ما كنا الأهل والقرابة

الأمر لله كل شيء له أسباب
وإلا الهوى وش لي على هج بابه

وشلون قلبي ما يجي اليوم منصاب
على الرجم منقوش بعض الكتابة
حتى أثر مشيه مع سهول وهضاب
مر يبين ومر ما يندرابه

قلبي من الفرقا صويب ومرتاب
كنه غدا نصفين من هول ما به

حزني عليه إنه تسبب ولا طاب
نظرة طبيبه عجلت في ذهابه
ريح الخزامى والنفل زين الأطياب
يشدني ريح السمر في ثيابه

لا أقبل نسيم الليل له خيل وركاب
وله في طلوع الشمس عز ومهابه