كتبت الحرف لأجل أنسى هموم البارحة واليوم
لقيت الهم في حرفي تربع يوم خطيته

يقولون الملا ظالم وأنا بلسانهم مظلوم
وأنا المشتاق والموعد على بالي تناسيته

رسمت أحلى معاناتي وراحاتي سما وغيوم
وليلٍ طالت دروبه ولكني تحديته

وقلبٍ ما شكى الفرقا وعينٍ تشتكي للنوم
إذا كان العمر جيه فعز الله ما جيته

مشاويره وهرج الليل وباقي من خفايا علوم
كثير أسباب خلتني غريب الحب في بيته

حبيب الأمس أذكرني أنا بفكرك بقايا حلوم
نسيت تذكر ليالينا وطير الشوق هديته

أحبك يا شقا باكر أحبك يا فرح هاليوم
كتبت الحرف لأجل أنساه ولا أدري كيف خطيته

كتبت الحرف لأجل أنسى هموم البارحة واليوم
لقيت الهم في حرفي تربع يوم خطيته