اسأليني قبل تجرحك الظنون
واسمعيني قبل يتعبك الغضب
أدري باللي فيك يالقلب الحنون
النوايا بيض والغيرة تعب

علميني كيف من حبك يخون
كيف أخونك وإنتي من نفسي أحب
خاطرك غالي وحبي لك جنون
والعمر ما بين رمشين وهدب

همك اللي ذاب في سود العيون
صدقيني ماله بقلبك سبب
ما سواك أحدٍ على روحي يمون
وما سوى حبّك على قلبي أنكتب

ما نشدت الشمس بعدك وش تكون
وما سألت الريح من وين المهب
عاتبيني حب والدنيا تهون
وشهو أحلى من الرضا عقب العتب