كنت حاضر في غيابك
مرك الطاري وجابك
جيتك كانت جريئة
وما ملك خطوتك خوف

ما ترددت في حضورك
جيتني تسابق غيابك
ما حسبت حساب خوفك
وما تحدتك الظروف

جيتني من غير موعد
وقبل أبادر في عتابك
قلت لي: والله أحبك
وعيني غيرك ما تشوف

جيت أبسأل ما قويت
خفت ينصفني جوابك
وانتحر فيني كلامي
وضعت ما بين الحروف

ورحت فجأة قبل ما أحكي
قبل ما أنطق يا هلا بك
ما عطيت اللهفة فرصة
تكتفي بلمس الكفوف

آه يا طاري حبيبي
مثل ما جابك سرى بك
إقنعه مرة يجيني
وتكسب بقلبي معروف