فزت الأشواق واحتار الكلام
وابتدأ يوم من العمر محسوب
دقت الساعة وله شوق وغرام
ساعتي اثنى عشر بعد الغروب

إبتدت تركض ثوانيها حرام
كل شمعة من بعد شمعة تذوب
في القمر نوره فضح ستر الظلام
ما ترك له من بقايا الليل ثوب

هز غصن الشوق ويطير الحمام
طيرك اللي يعجبك فوق الهبوب
كثر أسباب العتب وانسى الخصام
الهوى ما فيه غالب ومغلوب

ولا أحد أصلاً يحب الانهزام
لا ولا واحد على الحب مغصوب
لو يراعي فارق الوقت المقام
ما تراعي فارق الوقت الدروب

خل عيني لو ربع ساعة تنام
وشدني مثل الشفق يم الغروب
لو نسيتك قل على الدنيا السلام
وإنت لا تنسى مواعيد القلوب

الله من الشوق في وادي الهيام
والله من الصدق يا الفجر الكذوب
عيد الأضحى لو صدف عيد الصيام
ما حدٍ يقدر عن الثاني يتوب